自由行“樂” - 香港澳门游 （第五日）

不經不覺已經到咗香港澳門遊嘅最後一日啦，我哋將會搭下午2點45分嘅飛機返KL。由於冇乜時間，所以我哋都無話點去揾嘢食，就喺附近嘅茶餐廳度食早餐，之後就出發去機場啦。呢間茶餐廳就唔夠我兩年前喺太子附近嘅一間港式茶餐廳咁好食啦，不過都可以接受。

單- 好奇怪的字“冬0勿”，“XX油多”，“豬扒丐”，“餐旦通”

豬扒公仔麵

餐蛋通粉

油多

凍檸蜜

今次我惗住要買Baleno嘅多啦A夢杉，但係佢哋換咗，應該版權期過咗啦，變咗漫畫One Piece，不過我都唔中意呢個海盜嘅，所以無買到。

Baleno - One Piece

食飽過後，我哋就去機場啦，拎住啲行李穿街過巷搭地鐵，真係辛苦，兩個行李箱同埋一兩袋嘅戰利品，犀利嘞！

銀龍茶餐廳：
港鐵旺角戰B出口，往旺角西洋菜街59號地下

自由行“樂” - 香港澳門 （完）

自由行“樂” - 香港澳门游 （第四日）

話咁快就到咗第四日啦，由於時間冇多，所以我哋就要好好把握，要盡情地食嘢同埋買嘢。一早，我哋就去咗中環一間貴夾唔飽嘅茶餐廳度食嘢，啲嘢唔係話好好食，但係啲價錢就貴到飛起。我哋叫咗兩個蛋撻、一個菠蘿油、同埋一杯熱奶茶，就41蚊啦，係唔係好貴嘞。呢間茶餐廳係我喺Facebook度見到嘅video，以為有人介紹就好食啦，點知上車咗。

中環港土茶記

奶茶

蛋撻- 賣相唔靚（唔係酥皮）一個10蚊

菠蘿油

惗住吃飽之後就去搭叮叮啦，但係又沒食飽，喺半飽嘅情況之下，就去搭叮叮先啦，之後再去揾嘢食。原來電車嘅收費係咁平，一程無論幾遠，大人收費2蚊3毫，而小朋友就係1蚊2毫。不過如果趕時間嘅話，就唔好搭叮叮啦，因為佢行得好慢，不過坐住吹吹風都唔錯嘅。

叮叮 - 電車

電車路

在電車裡

與電車合照

電車收費表

之後我哋就去咗附近嘅名牌店行下，順便幫朋友買名牌手袋，喺KL都好少行啲名牌店，因為冇錢買，但係今次就唔同啦，因為有準備到錢，所以可以睇下。我仲有收穫添，開心死我啦。為咗值番個價，一有出街，我就會拿出嚟用，無謂浪費錢啦。一次就買咗兩個，雖然唔係話好貴，但係都覺得自己有啲奢侈，買咗有啲後悔。

行完中環，我哋就返去尖沙嘴，去食嘢順便揾Lomography嘅舖頭。我哋就去咗池記度食雲吞面啦，呢間係尖沙嘴分鋪，香港島加埋九龍，一共有5間分鋪。之後就叫咗一個細蓉同埋一個雲吞面套餐。香港雲吞面啲面比較硬，同KL啲好唔同，呢個比較有口感，但係我就中意佢哋嘅雲吞啦，鮮蝦雲吞，啖啖蝦，正啊！

池記 - 尖沙嘴

細蓉 （2粒雲吞，7錢銀絲幼面）

雲吞面

香蒜炸雞

由於我哋唔係食得好飽，所以我哋就去咗食香港街邊小吃，就係咖哩魚蛋啦，發覺到都唔係咁好食囖，好似麵粉團咁，都唔彈牙嘅。

街邊魚蛋 - 一串6蚊

之後就去揾Lomography舖頭啦，呢間真真係Lomo嘅舖頭，裡邊買好多唔同嘅Lomo相機，睇到都忍不住想買啊，不過彬彬不俾買，佢話我嗮錢。唔買都好嘅，因為我仲沒掌握得好好，下下都手震，影出嚟啲相濛濛，真係差到爆。

Lomography @ 尖沙嘴

過後我哋就去咗鴨寮街，專門售賣電子產品嘅地方，所以我覺得呢度買嘅嘢唔係咁適合我，但係彬彬就好有興趣，不過行都冇半個鐘，我就吵住要走啦。之後我就係某一個檔口睇到呢“一家大小”，就係Pig Pig豬啦。果陣仲沒中意呢隻公仔，係大概知道係《花花世界花家姐》裡面嘅豬豬公仔。返到KL，先開始睇套電視劇，呢隻公仔真係好得意啊，不過我唔買到。唉~

Pig Pig 豬

行到身水身汗之際，我哋就決定返酒店，衝個涼再出發啦。喺酒店附近有一間“陳記深井燒鵝”，無可否認係好吃，但係我口生飛滋，食嘢點到就痛，真係辛苦。所以果幾日，都唔係食得好好。

陳記深井燒鵝

燒鵝飯

之後我哋就去附近嘅朗豪坊度買飛睇戲，間戲院叫“UA Cinemas”，本應念住想睇3D肉蒲團，但係呢間戲院就無上影。不過都好彩無得睇，我女仔人家，睇呢啲片，好似唔係幾好。所以就選擇咗睇“熱浪球愛戰”，由最近力捧嘅羅仲謙同埋周秀娜主演，火辣辣嘅身材，真係睇到我都羨慕，男嘅大隻，女嘅素，不過佢哋啲演技就麻麻啦。原來喺香港睇戲係咁貴嘎，一張飛要65蚊，喺KL嘅話，我可以睇3套戲啦。不過冇相干，只在乎嘗試。

UA @ 朗豪坊

熱浪球愛戰 - 戲飛 （10點）

睇完都差唔多12點，返酒店路徑一間甜品鋪“五代同糖”，咁夜都仲咁多人排隊，一定好好食。我哋等咗大約10分鐘啦，就有位啦，除咗點佢哋最出名嘅雞蛋布丁之外，我仲點咗一個楊枝金露同埋一個焦糖布丁。3樣都好好食啊！啲布丁好滑啊！正！

五代同糖

雞蛋布丁

楊枝金露

焦糖布丁

港土茶記：
香港中環皇后大道中139號地舖

池記：
九龍尖沙嘴樂道52號地下

Lomography：
九龍尖沙嘴加連威老道52-52A地下

陳記燒鵝茶餐廳：
九龍旺角新填地街427-427A地下

五代同糖：
九龍旺角山東街38號38廣場2鋪

話都無咁快，就要到最後一日啦，真係唔捨得。

待續。 。 。自由行“樂” - 香港澳門遊（第五天）

自由行“樂” - 香港澳门游 （第三日）

壽星妹

生日快樂

7月7號係小妹我嘅生日，今年就破費咗D，去香港慶祝生日。當日我哋就安排咗去澳門，彬彬嘅至愛，因為有得“賭”。兩年前嚟過，當時導遊同我哋講全澳門大大細細有35間賭場，兩年後唔知會晤會多咗幾間嘞。就算得30間，我哋都去唔曬啦。所以今次我哋就鎖定咗三間賭場，係一定要去嘅，就係葡京、新葡京、同埋金沙啦！

由於今次係自由行，所以冇導遊，乜都要自己安排。我哋一早就搭港鐵到上環，係上環信德中心果度搭船去澳門。班船係11點35分，所以有時間吃早餐，吃完早餐，我哋就進閘口上船。唔知係唔係遲咗嘞，原本買普通座位嘅我哋，竟然可以坐豪華艙位。 賺到啦！

11點35分班船

噴射飛航登船閘口

豪華艙

大約一個鐘後，我哋就到咗澳門碼頭啦，出到門口果一刻，我哋就見到好多賭場嘅布條，仲有我見到好多賭場嘅穿梭巴士，第一站就去葡京。一入到裡面，真係金碧輝煌，有好多好靚嘅裝飾，最衰賭場裡面晤俾影相，如果唔係就可以影嚟做紀念。

碼頭外面

葡京穿梭巴士

澳門葡京

葡京

好靚裝飾

澳門賭場好唔同，除咗有大家都熟悉嘅百家樂、輪盤、21點、角子機之外，仲有啲其他嘅。例如有雙色骰子、番攤、牌九、同埋魚蝦蟹。我哋就樣樣都試下，結果就輸到一僕一碌，運氣真係差啊。彬彬就好好彩啦，喺賭場抽到100蚊籌碼，我就淨係抽到一個瑣匙圏。到最尾就連呢100蚊都輸埋，真慘！

中獎100蚊籌碼禮卷

去咗葡京，就去新葡京，結果都係一樣，輸錢啊！之後我哋就搭穿梭巴士回去碼頭，再去金沙。搞过一轮之后，我哋就搭船返香港啦。唔知係唔係夜晚浪大，我覺得隻船好搖好晃。搞到我有D頭暈，仲要坐喺船艙嘅上排，等落船果下，真係攞我命，要嘔咁啊，真辛苦。

金沙穿梭巴士

老公與老婆合照

之后就決定去廟街行下，我嘅生日晚餐就係去油麻地廟街嘅興記度解決啦，雖然係好普通嘅一餐飯，但係好開心啊。

油麻地廟街興記

煲仔飯

椒鹽瀨尿蝦

鼓椒炒蜆

港澳碼頭：
港鐵上環站，往信德中心3樓，乘搭噴射飛航

日航船票：151蚊
夜航船票：194蚊

待續。 。 。自由行“樂” - 香港澳門遊（第四日）

自由行“樂” - 香港澳门游 （第二日）

第二日，我哋嘅行程就係去食點心，去到香港一定要食嘎，之後就去海洋公園。

今次我哋去上環附近嘅一間茶樓度食點心，试下“一盅两件”。就係“蓮香樓”啦，據說有近百年曆史嘎,呢度係一間舊式嘅茶樓，要自己揾位，好彩得我哋兩個人，所以比较容易搭檯，同埋我發覺到啲企堂沖茶夥計都係有啲年紀嘎，果然係古老嘅茶樓啊。由於得我哋兩個人，所以我哋叫咗幾籠點心嚟试下，其中特點就最好食啦。4款點心同埋兩盅茶，食咗我哋80蚊，真係好貴啊！不過貴都係其次，最重要係好食。

香港上環蓮香樓

特點（好料）

烧卖

點心（唔知乜名）

包點

企堂沖茶夥計

手推點心車
一眼睇過去人山人海高朋满座

食飽飽之後，我哋就出發去海洋公園啦！好彩去之前，喺街邊買咗把遮，如果唔係，就會見到兩個黑炭頭啦，因為真係好曬啊。我哋喺上環站乘搭港鐵到金鐘站，再搭巴士直到海洋公園。到咗地鐵金鐘站出口，就會見到好多前往海洋公園嘅巴士，巴士編號629，跟住大隊上車就包無錯，大約10分鐘車程，我哋就到咗海洋公園啦。

我哋首先到櫃檯拿入門卷（早前喺網上買咗票啦），仲有當然唔少得公園地圖同埋表演時間表啦。太陽實在太厲害啦，曬到我都唔乜想行，但係啲票好貴（要250蚊港纸），所以唔可以嗮，更何況，嚟到唔通唔睇下咩。

香港海洋公園

嚟到海洋公園，梗要影张合照啦！彬彬与我

好靓嘅入门卷（熊猫与海狮）

我们的合照

海洋公園分兩個樂園，分別係海濱樂園同埋高峰樂園，海濱公園位於下方，而高峰樂園就喺上方，要上去高峰樂園，可乘搭海洋列車或者係登山纜車。我哋就想兩樣都試下，就首先乘搭海洋列車到高峰樂園，睇完一連串嘅表演，就搭纜車返去海濱樂園。

登山纜車

要睇到最靓嘅风景，一定要坐上海洋摩天塔，喺高处望落去真係好靓嘎，俾一片海围住，靓爆啊！

靓！

喺咁靓嘅环境之下，梗係要影多两張相留恋啦！多谢我哋嘅tripod，全程啲合照都只因有佢。嘻嘻！

合照1

合照2

海洋公園有好多唔同嘅機動遊戲，唔知係唔係老咗，我睇到咁刺激，我就驚驚，所以一樣都無玩到。同埋睇到排曬長隊，都唔想玩啦，不過睇住其他人搞都一樣嗟。

翻天飛鷹

極速之旅

翻天覆地

行到熱辣辣嘅時候，就俾我見到呢個啦，“消暑西瓜”一粒35蚊。吃完當場清涼曬啊！

消暑西瓜

喺海洋公園睇表演，一定要早啲到，如果唔係。 。。連位都無得你坐啊！我哋睇嘅第一個表演就係[海洋伴我心]，係海豚同埋海狮嘅表演。第二個就係[天上王者]，好明显地係雀鳥表演，成個表演要带出嘅讯息就係保护大自然生态，唔但只有清晰嘅讯息，而且仲有好多雀鳥出现喺我哋眼前。而第三個表演，有啲奇怪，就係[海洋公園夏水禮]跳水表演。大概有6/7位嘅表演者，玩花式跳水，開始睇有啲無聊，但係到後面就好緊張，因為有一個人爬到好高嘅跳水台度准备要跳落嚟，真係驚佢會失足跌落嚟。

海洋剧场 - 海洋伴我心

海豚表演

海狮表演

天上王者

有两只雀喺天空飞翔

海洋公園夏水禮

行下行下就睇到有塊許願板，其他人都係寫到細細，我就貪心啲，擦曬人家嘅願望，就寫咗我嘅願望。

早生貴子、快D發達

行到5點幾，係時候返啦，成個公園咁大，我惗我哋應該行咗三分之一嗟。臨走前，梗係要買啲紀念品啦。除咗兩個雪櫃磁鐵，就係呢兩隻企鵝啦，粉藍色同埋粉紅色，佢哋係一對嘎！係唔係好得意嘞。但係我最想買嘅係隻熊貓，隻熊貓公仔好得意嘎。不過要599蚊，好貴咯，所以我就無帶到佢返嚟，如果平啲，我会考虑下买嘎。

天天晴晴

熊猫与我

帶住依依不捨嘅心情離開海洋公園，之後我哋就去咗女人街行街買嘢，彬彬喺G2000掃到好多平恤衫，一件99蚊，抵到爛！换返马币，一件都唔使40蚊，喺KL 70%大减价都無咁平。我都買咗一件正式嘅返工衫，如果有應徵嘅，都有件好睇啲衫著咯。

蓮香樓：

港鐵上環站E2出口，穿過新紀元廣場到一個三條街（皇后大道西、蘇杭、文咸東）的交匯處，繼而左轉選走“皇”至右方（158-168）旁的石級而上就到了

香港海洋公園：

港鐵金鐘站B出口，轉乘629線巴士

待續。。。自由行“樂” - 香港澳门游 （第三日）